Të dashur miq të hapësirës publike,

Këtë verë përfundoi me sukses edicioni i njëmbëdhjetë i HAPU- Festivali i Artit në Hapësirë Publike. Për herë të parë, festivali u shtri edhe në Gjakovë, në bashkëpunim me Fondacionin “Për Gjakovën”, duke sjellë artin në rrugët dhe sheshet e qytetit më 1–2 gusht, ndërsa nga 2–5 gusht, Prishtina u kthye në një skenë të gjallë për artistë nga Franca, Gjermania dhe Portugalia.

Çfarë përjetuam së bashku?

• Rrotullimet magjepsëse të Juan Ignacio Tula na çuan në një udhëtim mes përjetimeve universale e personale, duke e shndërruar energjinë e rrethit në poezi lëvizjeje.

• Tac o Tac na rikthyen rrugëve të qyteteve me kërcime të papritura dhe energji shpërthyese, duke i bërë qiellin dhe trotuaret pjesë të lojës.

• Origami gjigante të Frank Bölter, që i palosëm bashkërisht me publikun, u bënë simbol i lojës kolektive dhe transformimit të përbashkët.

• Mimo’s Dixie Band solli tingujt e Nju Orlinsit dhe krijoi një atmosferë ku muzika, publiku dhe artistët u bashkuan në një spektakël të gjallë e plot jetë.

Faleminderit të gjithë atyre që u hapën ndaj lojës, ndaj mahnitjes dhe ndaj njëri-tjetrit. Ky edicion nuk do të kishte qenë i njëjtë pa ju.

Shihemi verën e ardhshme, në një tjetër kapitull të HAPU!