Kolektiv artistësh nga Kosova X-TERR Udhëtim artistik me makinën tuaj (KOSOVË)

Kthehu mbrapa

Rreth Ngjarjes

X-TERR Udhëtim artistik me makinën tuaj (KOSOVË)

Punë artistike në progres

X-TERR ka të bëjë me mundësinë artistike për ta transformuar një pjesë të veçantë territoriale brenda një territori “normal” që përjetohet duke lëvizur me veturë. Publiku ftohet të lëvizë me makinë përmes një instalimi audio-vizuel që ndodh përmes zërimit të makinës. Ky projekt vë në pikëpyetje hapësirën e sigurt individuale. Çka ndodh kur hapësirat tona individuale hapen dhe shkrihen me hapësirën kolektive? Si ndikojnë këta kufij psikologjikë në gjendjen tonë mendore? Si ndryshon ky realitet nga ndikimi i forcave politike, tendencat globale, krizat e refugjatëve dhe sfidat ekonomike?

Duke lëvizur në këtë territor fizikisht dhe virtuelisht, vetura dhe hapësira ajrore e saj prej 12 metrash kub shndërrohet në metaforën në rrota të lirisë sonë individuale brenda lirisë kolektive. Çka nëse identiteti ynë duhet, apo ne zgjedhim që të fshihet në një kontekst apo territor të caktuar?

Emri X-TERR rrjedhë nga kodi i përkohshëm ndërkombëtar i Kosovës – XK. X përfaqëson të panjohurën, neutralen, të pazgjidhurën dhe të përkohshmen, kurse TERR përfaqëson territorin. Të frymëzuar nga përjetimet tona gjatë viteve të 90-ta në Kosovë, kur vetura ishte një lloj ambasade e lëvizshme e lirisë së kushtëzuar të familjeve tona, ne duam të krijojmë një “juridiksion” artistik eksterritorial.

Mirë se vini në X-TERR. Ne ju falënderojmë që keni zgjedhur ta vizitoni territorin tonë.
Dukagjin Podrimaj, Ilir Bajri, Florent Mehmeti

Përkrahur nga Ministria e Kulturës, Rinisë dhe Sporteve.

X-TERR është përkrahur nga rrjeti IN SITU, në kuadër të projekteve Platforma dhe ACT. Këto projekte janë të financuara me përkrahjen e programit Evropa Kreative nga Komisioni Evropian.